తానా తందానా.............!

పార్లమెంటు తలుపులు బిగించి టీవీ ప్రత్యక్ష ప్రసారాలు ఆపించి కండబలముతో దౌర్జన్యముతో తెలుగుజాతిని తెలుగు భూమిని దగ్గర ఉండి రెండుగా చీల్చిన పూజ్యులు పెద్దలు గౌరవనీయులు శ్రీమాన్ ముప్పవరపు వెంకయ్యనాయుడు గారు రేపోమాపో అమెరికాలో నివశించే తెలుగుజాతి వీరులు దేశభక్తులు అత్యంత నిరాడంబరంగా రికార్డింగు డాన్సులు లాంటివి ఏమాత్రం లేకుండా, ఎవరి భోజనాలు వాళ్ళే తెచ్చుకునే విధంగా, దరిదాపు నాలుగు లక్షల డాలర్ల కేటరింగు కాంట్రాక్ట్ ఒకరికే లేదా కేవలం ఒకే వ్యక్తికీ చెందినా సంస్థకి ఇవ్వకుండా, ట్రావెల్ ఏజన్సీ కూడా సొంత మనుషులకు చెందినది కాకుండా బయటి వారికి ఇచ్చి, ఒక్క నయాపైసా కూడా సంఘం సొమ్ము దుర్వినియోగం కాకుండా, తానా అధినాయకులే ( ముగ్గురు రింగు మాష్టార్లు లాంటి ప్రధాన వ్యక్తులు ) తమ సొంత జేబుల నుండి తీసి ఖర్చు పెడుతూ, అక్కడ జిల్లా వారీ సంఘాలు గ్రూపులు లేకుండా ఘనంగా జరుపుకునే " తానా సంబరాలు" కు ముఖ్య అతిధిగా వెళ్లుచున్నారు, చాలా సంతోషం గర్వకారణం కూడాను.
అక్కడ అమెరికాలో నివశిస్తూ ఎప్పుడూ తెలుగుజాతి కోసం తెలుగు నేల కోసం, తెలుగు సంస్కృతీ సంప్రదాయాలు కోసం అహర్నిశలు కలవరించే నిరాడంబరులు, ఇక్కడ తెలుగు నేల మీద ఏమాత్రం ఇబ్బందులు వచ్చినా అక్కడ తిండీతిప్పలు మానేసి మనకోసమే నిరంతరమూ పాటుపడే తెలుగు వీరులు, ఆంధ్రాలో ఉండే నిర్భాగులు అందరు తానా వాళ్ళు ఎప్పుడెప్పుడు ఆంధ్రాకి వచ్చి వాళ్ళ కష్టాలు తీరుస్తారా అనే విధంగా ఇక్కడ సేవా కార్యక్రమాలు చేస్తూ, అధికారా కేంద్రానికి ఆమడ దూరములో ఉంటూ తానా సంస్థని ఏమాత్రం తమ స్వార్ధం కోసం వాడుకొని నిస్వార్ధ జీవులు, ఇక్కడ ఎవరు అధికారములో ఉంటె వాళ్ళ కాళ్ళు పట్టుకోకుండా, వాళ్లకు భజన చెయ్యకుండా, కేవలం ఏ ఒక్క కులానికో కాకుండా అమెరికాలో ఉండే అన్ని కులాల తెలుగువారిని ఒకే త్రాటి మీదకు తెచ్చి, వర్గవిభేదాలు లేకుండా, కులానికొక సంస్థ లేకుండా, ప్రతిసారి ఒక్కొక్క కులానికి తానా సంస్థ నిర్వాహణా బాధ్యతులు ఇస్తూ అందరికీ ఆదర్శముగా ఉంటూ, నిధులు ఏ మాత్రము దుర్వినియోగము చెయ్యకుండా, తానా నాయకులు మాత్రమె వారి వారి సంపాదనలో భూరి విరాళాలు ఇస్తూ, అప్పట్లో చంద్రబాబుకి, ఆ తరువాత రాజశేఖరరెడ్డి కి, మరలా ఇప్పుడు చంద్రబాబుకి కెసీఆర్ కి భజన చెయ్యకుండా పాద పూజలు చెయ్యకుండా, వాళ్ళ నుండి ఎటువంటి పదవులు పనులు ఆశించకుండా, తానా తిరనాళ్ళలో కేటరింగు కాంట్రాక్ట్ ఎప్పుడు ఒకే సంస్థకు / మనిషికి ఇవ్వకుండా, సంస్థని ఏ ఇద్దరు ముగ్గురు చెప్పు చేతలలో పెట్టుకోకుండా, అస్సలు రింగు మాష్టార్లు అనే పదాన్ని దగ్గరకు చేరనివ్వకుండా, ఆంధ్రప్రదేశ్ రాష్ట్రములో / తెలంగాణా రాష్ట్రములో ఏ పార్టీ అధికారములో ఉంటె ఆ పార్టీకి లేదా ఆ అధినేతలకు బానిసలుగా, పైరవీ కారులుగా మారకుండా, హైదరాబాదులో తానా నాయకత్వము పేరుతొ రియల్ ఎష్టేట్ దండాలు సెటిల్మెంట్లు చెయ్యకుండా. నోబుల్ స్థాయిలో చదువుకున్న వారు వాళ్ళ రంగాలలో అంతర్జాతీయ స్తాయిలో ఎంతో పేరు ప్రఖ్యాతులు పొందిన లబ్ధ ప్రతిష్టులు మాత్రమె గత దశాభ్దముగా తానా సంస్థకి అధ్యక్షా కార్యదర్శులుగా ఇతర పదవులలోను నాయకత్వం వహిస్తూ, రేపు రాబోయే కాలములో కూడా అటువంటి లబ్ధప్రతిష్టులనే నాయకులుగా గెలిపించుకుని ప్రపంచానికి ఆదర్శముగా నిలిచినా అమెరికా తెలుగు సోదరులు ( సారీ ... కమ్మ సోదరులు ), రేపు కేంద్ర మంత్రి వెంకయ్య నాయుడు గారిని ఆయన ఆనాడు పార్లమెంటులో ఆంధ్రప్రదేశ్ రాష్ట్రానికి ప్రత్యెక ప్రతిపత్తి కల్పిస్తాము అని, ఆ స్పెషల్ స్టేటస్ కేవలం అయిదేళ్ళు కాదు పదేళ్ళు ఇస్తాము అని, మీరు భయపడాల్సిన పని లేదని, బీజేపీ అధికారములోకి రాగానే ఆంధ్రాకి ఒకటే నిధుల వరద అని, ఆంధ్రాని భూతల స్వర్గం చేస్తామని, పదేళ్లల్లో ఆంధ్రాని ప్రపంచ స్థాయికి తీసుకు వెళతామని చెప్పిన మాటలు, ఈనాడు స్పెషల్ స్టేటస్ రాదు , వీలు పడదు అని కుంటి సాకులు చెబుతున్న శ్రీమాన్ వెంకయ్య నాయుడు గారిని ఈ తానా నాయకులు సభ్యులు నిలదీసి అడగగలరా ..? ఈ తానా వారికి తందానా అనే కొంతమంది దళారీ రాజకీయ నాయకుల అండ చూసుకుని, వాళ్ళను అక్కడకు ఈ తిరునాళ్ళకు ప్రత్యేకముగా తీసుకెళ్ళి లాస్ ఏంజిల్స్ లాంటి ప్రదేశాలలో రకరకాలుగా సేద తీరుస్తూ వారికి అక్కడ అన్ని అవసరాలు తీరుస్తూ వారిని పైరవీలకు సొంత పనులు చక్కబెట్టుకోవడానికి వాడుకుంటున్నారు అనే అపప్రద ఏమాత్రము రాకుండా చాలా హుందాగా నిర్వహిస్తున్న తానా తందానా సభ్యులకు నాయకులకు శుభాభినందనలు.
మీరు రేపు వెంకయ్యనాయుడు గారిని కేంద్రం ఆంధ్రప్రదేశ్ రాష్ట్రము మీద సవతితల్లి ప్రేమ చూపించడాన్ని, నిధులు లేకుండా, స్పెషల్ స్టేటస్ లేకుండా చెయ్యడాన్ని నిల దీస్తారా ..? నిగ్గదీస్తారా ? లేక శ్రీ వెంకయ్యనాయుడు గారి హోదాని పదవిని మీమీ సొంత అవసరాలకు అవకాశాలకు వాడుకుంటారా ?